有日看到電視廣告，維記出了一款新產品叫做「Yo-jelly」中文名叫「乳酪啫喱」。我最愛試新出的食物，所以便走到超市買了兩種味回家試食。
試食嘅時候我突然靈機一觸…我何不以赤箕茶凍代替 Yo-jelly 面頭那層啫喱呢？於是我就坐言起行，買齊材料做咗幾杯自製乳酪茶凍畀自己同屋企人試。
當日下午做好之後，我已經急不及待試食。嘩，真係好好味。當晚我再做畀我先生食嘅時候，佢竟然話唔夠喉喎，仲喺我嗰份度分咗一半畀佢，而且仲問我幾時再做喎…
我個仔一向唔食乳酪，而且好多生果，例如奇異果、火龍果…佢都唔鍾意食。那天晚上我問佢要唔要試下我做嘅乳酪茶凍？
但佢話：「我唔鍾意食乳酪嘅喎。」我就話：「你試下啦，真係好好食咖。」試過之後佢就對乳酪改觀咗嘞，佢話好好食喎。
其實每次喺做茶凍嘅過程裡面，我都會刻意加入唔少新鮮嘅生果。我個仔食嘅時候就不知不覺咁食多咗一啲佢平時唔多鍾意嘅有益生果嘞。
我諗呢個係一個幾好嘅方法。
幾天後，我又試做咗芒汁茶果凍…
試過之後，我覺得真係可以同X記、許XX比併呀。我個仔同先生最愛芒果，呢個做法真係食到佢哋唔停口，心思思成日問我幾時再做？
我甚至將我嘅製成品拍成照片，然後上載到 facebook 引我哋嘅朋友，哈哈…
茶凍真係有好多唔同嘅做法，例如：加檸檬做成檸檬茶果凍，加薑紅糖做成薑茶果凍，又是另一番風味，咁就唔駛下下淨係飲茶咁齋啦！我會繼續發掘其他嘅做法。
鈴木悠然
