有一日，教練打電話嚟問我想唔想畀人訪問。
我話：嗄，訪問？訪問咩呀？
教練話：你食咗咁多年有機菜，咪講下你食有機菜嘅經驗囉；您平時又咁多嘢講，係時候回饋番畀社會嘞。
我話：嗄，嗰陣時講同上鏡講兩回事嚟咖喎！嗰陣時我講就講畀你聽咋喎，而家講就講畀全世界聽喎，好驚驚咖喎。
教練話：驚就唔好嘞，唔該，拜拜。
佢噉就收咗線。
我諗下諗下：
我真係食咗好耐有機菜喎，我又真係有心得喎，噉講畀人聽又有乜所謂唧…
但係唔知點解，我又真係好驚上鏡喎…
都係問下教練有冇人陪先。
於是，我就打電話問教練。
教練話：有，有機認證個阿頭陪你一齊上鏡。
我話：嗄？重驚。我講錯咗點算呀，一陣間我講錯咗會唔會畀佢打手板咖？
教練話：你諗清楚先啦！
跟住佢又收咗線。
我再諗：
啲人成日問我食有機菜有乜咁好？
我會同佢哋講，價錢就一定貴一啲，不過就至少唔會食啲有劇毒嘅農藥同啲違反自然嘅基因嘢落肚囉。
我又諗：
我知道自己食緊啲乜嘢落肚，有乜嘢唔明白都會打爛沙盤問農夫，邊食有機菜邊學習有機知識，响全世界學埋學埋講返畀全世界聽，好合理啫。
我諗完一大輪之後，個心定番啲嘞，於是就打電話畀教練。
我話：好啦，我去啦。咁到時講咩呀？
教練就話：講心嗰句咪得囉。
咁跟住佢又收咗線。
我又諗：而家講出嚟就梗係冇問題啦，但係到時講唔講到出嚟呢？要唔要用紙寫低照住讀呢？…
非常緊張，直頭有啲內分泌失調。
不過，話之佢啦，休息要緊，眠一眠先。
有機菜訪問