我記得當初做番面部淋巴引流係因為我覺得自己大細眼嘅問題嚴重咗。做咗一排之後我發覺眼嘅大細相差少咗，眼皮冇咁重，而且早晚做效果更加明顯。慢慢我覺得我對皮膚都多咗感覺，可能皮膚感覺到我喺度照顧緊佢啩。跟住我就開始好享受每日自己雙手去貼住皮膚嘅感覺。
由呢個時候開始我就覺得每次做通淋巴嘅時候，都會察覺到皮膚嘅變化，例如: 我嗰排會唔會食嘅嘢有問題呀？邊啲部位有粒粒呀？又或者皮膚好光滑、狀態好好呀？我覺得直情係一個好明顯嘅指標去話我知當時身體嘅狀態係好定唔好，我覺得自己了解多咗自己。
相對我同年齡嘅人，就算我冇做醫美都好，我個下巴嘅線條同埋面部嘅輪廓就冇嗰種水腫腫脹嘅情況。最明顯就係我塊面可能有啲凹凸嘅痕係好厲害，做呢個通淋巴之後會見到啲痕係淡咗。
之前每次開嗰個淋巴位嘅時候，我就冇乜特別嘅感覺，但當我習慣每日做之後，我就真係有一刻覺得有啲淋巴位係通咗，即係佢唔係突起脹起嘅，直情係好順暢好滑， 而唔係撳落去凹凸不平。
自始之後我就好享受，並且每日都盡可能最少做一次，咁我就覺得各方面都好舒暢。我知道而家有好多人都用好多醫美嘅產品，但我就唔需要都可以達到類似嘅效果。
仲有一個好處想同你分享:
我每日通淋巴嘅時候，因為摸到自己個下巴同埋頸嗰啲粒粒，好多時啲人有病其實係已經有先兆或者腫起咗嘅，但係好多人都唔察覺，跟住突然間就話個病好嚴重嘞，但係我做呢個通淋巴嘅時候我就一路都知道自己嘅狀態，唔會畀身體去到好嚴重嘅時候至去注意自己囉，咁我覺得呢一個其實係一個好大嘅好處。
Wendy，叻！
持續練習，必有所得。
