71 奴才 A bond servant

[張慧儀]

跟教練面談，討論如何令學員早一點上床休息這話題。

教練好像很有耐性地跟我討論我提出的各個方案。時間一分一秒地過，我的白花花銀紙正一點一點地給燒呀燒，就在最後那五分鐘，教練忽地說了幾個字：咪用番鬧鐘囉。

我雙眼瞪得大大的問，較幾多點呀？
教練答，9點半。
我再問，吓？咁晏至起身？
教練話，係夜晚9點半。
我問教練，咁即係點？
教練話，較好鬧鐘，晚上準9點半就鬧，提醒您早點休息。
我話：嘩，咁早瞓，咪五點就起身？
教練話：9點半鬧鐘響，提醒您去刷牙洗面落妝痾殊殊洗白白同埋準備好心情去瞓覺，上定床，10點半前自然瞓著。

這方案離奇得來又好似都行得通，我立刻努力吸收；其間一定係畀教練見到我慒盛盛個樣，他有點於心不忍，繼續解說道，全地球嘅生物之中，只有人類要依靠鬧鐘來嘈醒自己先識開眼起身咁戇居。
我諗下，又係喎。
佢繼續講，如果您要依靠鬧鐘來嘈醒先識起身，您豈不是做咗鬧鐘嘅奴才？
我諗下，又係喎。

我於是的起心肝去實踐這個本末倒置鬧鐘使用方法。幾周下來，每晚鬧鐘9點半響，我10點半前已睡得香甜，早上又真的6點左右自動自覺睜開眼仔，精神爽利。

身體適時休息，就可以分配能量為您作修補。休息足了，早上不用鬧鐘也會自然醒來，水腫都冇咁易煩到您。

如果您也實行這個方法，記得把心得和感受貼網跟大家共享。