老晴部落

實話實說唔老作;可以講心唔講金
張慧儀
文章: 1621
註冊時間: 2006-05-10, 00:11
聯繫:

老晴部落

文章 張慧儀 »

圖檔

老晴
↑↑↑ 似唔似我呀?佢未識中文打字之前,文章就暫時由佢大姑媽我筆錄。

張慧儀..

老晴
文章: 48
註冊時間: 2007-09-10, 09:56

夾親 Cody’s diary 01

文章 老晴 »

圖檔

小女子晴晴,就讀聖心心小學二年級,就快八歲。
我媽子個大姑奶叫我做老晴,佢認為我非常美麗、人見人愛、大方、好攬、好乖、…不過唔鎮定。

我畀車門夾親手指,就係呢三隻,好痛、好驚、重係好痛、…不過唔敢喊。

嗰日,我帶咗媽子、姐姐、我媽子個大姑奶三個大人去街,佢哋買完餸,我幫佢哋截的士返屋企。上車嗰陣,我畀的士車門夾實三隻手指。
我見到啲手指畀度車門夾實,就細細聲咁,好斯文咁叫:夾住!夾住!

我媽子個大姑奶重問我夾住乜嘢?我成日都覺得佢嘅視力可能有問題。
我好老實咁講:手指,手指…
我媽子即刻打番開夾實我三隻手指嗰度車門,我覺得佢當時好似有啲失控,鬧我,話我唔小心,有乜理由坐响後面,隻手可以伸到咁長,啲手指重放正正喺條車門罅度!…我都唔知點解,諗落又真係冇乜理由。

我媽子個大姑奶叫我畀隻手佢睇,我見到中間三隻手指夾凹咗,又夾到瘀咗,佢重問我痛唔痛,前面個的士司機話梗係痛啦,媽子話十指痛歸心,好彩係佢夾,唔係男人夾,…不過我唔知點解佢哋會咁講嘢,冇啲同情心。

我媽子個大姑奶唔聲唔聲喺個袋度攞咗一樽仔有陣味嘅嘢出嚟,倒咗幾滴油落我夾凹咗嗰度,佢又問我痛唔痛?我話好嗱。佢話嗱就啱啦,然後就開始同媽子講大人嘅嘢。無幾耐,佢又攞咗另一樽有陣味嘅嘢出嚟,又倒咗幾滴油落我夾凹咗嗰度,重幫我輕輕掃咗幾下,我覺得好舒服。

返到屋企,媽子話夾親邊度邊度就要揸牛油,我媽子個大姑奶話揸香薰油就得咖嘞。佢又叫我畀啲手指佢睇下,我見到中間夾到凹得最黑最緊要嗰喥好似好番啲,已經無咁痛,我又無咁驚。後來佢幫我揸多幾次,手指頭就屈得嘞,而且重冇咁痛添。

第二朝,媽子個大姑奶幫我再揸多兩次香薰油,佢就話我好番晒嘞。我問佢嗰啲係乜嘢油?佢話等我大個啲先至教我。…不過,我都知道啦,佢幫我揸嘅油叫做香薰油,我重記得嗰兩陣味。

老晴
文章: 48
註冊時間: 2007-09-10, 09:56

野餐溫書書 Cody’s diary 02

文章 老晴 »

圖檔

媽子同我講,媽子個大姑奶下午來我家嘆幾個鐘頭世界,問我想唔想佢帶我去食午飯?媽子個大姑奶喎,梗係想啦。跟住,媽子又話,請咗佢幫我溫數學,最緊要係唸熟個乘數表。

媽子個大姑奶打電話嚟問我想食乜嘢?我當然話去老麥啦。佢叫我帶課本、兩塊膠枱布、重要帶埋姐姐。我問佢,點解食飯要帶書又要帶膠枱布?

佢話,成日喺屋企溫書咁悶,今日帶我去公園野餐兼溫書。野餐我都唔知係乜,於是問佢,佢就話即是一邊食嘢一邊溫書一邊睇風景。我心諗,又玩又溫書,咁都得?諗還諗,我飛快地拉著姐姐出門找媽子個大姑奶去。

我哋去老麥買完兒童漢堡飽餐、田園沙律、粟米後,拿著大包小包往公園走去。去到公園,媽子個大姑奶叫姐姐揀地方,佢話姐姐星期日去慣野餐,最拿手揀好地方。

姐姐帶我們穿過一條隱閉嘅小徑,上了一個小山坡。我們在一處綠草如茵、又有矮椰樹遮蔭的地方停下,鋪好枱布、脫掉鞋子、搬啲嘢食出嚟開餐。

媽子個大姑奶讚姐姐識揀地方,我地望到大海,重有快艇拖著一個人滑水添、又剛好有三條樹幹供我們作靠背,又有微風…

我最怕小昆蟲,媽子個大姑奶話而家係我哋踏進了牠們的居所,所以要跟牠們共存,唔可以大聲呼叫、也不可以隨便踏死螞蟻。

我咁大個女,都係第一次咁樣食嘢,原來呢種就叫做野餐,都幾得意。我咬住漢堡飽嗰陣,媽子個大姑奶叫我唸一嘅乘數表畀佢聽。我同佢講,媽子話一嘅乘數表太容易,唔駛唸。但係,媽子個大姑奶話,就係因為容易唸、一定識唸、所以就要唸,等自己一唸就有信心、有成功感喎;其他那些就會更容易入腦。我唔明佢講乜,但係聽落又幾有道理。

開完餐無耐,姐姐看書,媽子個大姑奶就叫我躺下來,我問佢係咪要瞓覺?佢話唔係,係躺著唸乘數表。就係咁,我開始唸,唸唔上時,佢又要我坐起身,用筆寫低。我見到有蝴蝶、蜻蜓、螞蟻、麻雀、白鴿、樹木陪著我溫書,我都未試過睇住隻麻雀向我跳過來,近到伸手都差點可以摸到佢。

唸唔啱又要重頭唸過,一個乘數表至少都唸咗五次。就係咁又寫、又唸、又唸、又寫、佢重教我唸多一個十嘅乘數表添,同一一樣咁容易。等到我每個成數表都熟唸咗一次後,媽子個大姑奶話都嘆咗成個幾鐘頭世界,係時候返屋企啦。

於是,我、姐姐和媽子個大姑奶就沿海邊步行回家,一邊行佢一邊抽問我,七八幾多呀?九九呢?點知我大部分都識答,諗都無諗過,野餐溫書咁好玩。

老晴
文章: 48
註冊時間: 2007-09-10, 09:56

搖搖 Cody’s diary 03

文章 老晴 »

圖檔

》您哋估下我想講乜嘢畀您哋聽吖?

》媽子個大姑奶終於得閒喺今日11月12號幫我貼呢篇嘢上嚟啦!

考完試,返去探嫲嫲、爺爺、媽子個大姑奶同埋其他姑媽。我最喜歡食完飯坐喺大人身邊,聽佢哋講嘢,我好多時都知道佢地講緊乜嘢咖。

媽子個大姑奶同埋姑媽捧住本書,裡面有好多冇著衫嘅公仔,我一定睇埋一份。

我見到啲公仔好得意,個個都有一啲圓圈放喺身上唔同嘅地方。我問媽子個大姑奶嗰啲係乜嘢嚟嘅?佢話,嗰啲係輪位。我都唔明乜嘢叫做輪位,咪問佢囉。

媽子個大姑奶就話:老晴,係咪想知?係就瞓低啦。噉我想知哎嘛,咪瞓低囉,不過冇瞓著。
媽子個大姑奶拎咗嫲嫲條頸鍊出來,唔知點樣就話清洗完,跟著就放喺我個頭對上嘅位置。我見到條鍊喺我個頭對上係咁打圓圈,我問佢點解會咁?佢話係用個靈擺嚟測試下我啲輪位平唔平衡,呢個叫做頂輪。

(…呵,原來嫲嫲條頸鍊畀人改咗個名叫做靈擺,唔怪得之會擺下擺下啦…)

做完頭頂,媽子個大姑奶就將條鍊移去我兩個眉頭正中,點知個圓圈相反方向轉。我問佢點解會咁?佢話呢個第三眼嘅輪位麻麻地,要處理一下。佢叫我個第三眼乖乖地,我個心又叫佢乖乖地,我望到個圓圈慢慢轉番方向。

之後,媽子個大姑奶就將個靈擺愈擺愈落,不過我唔驚。喉嚨叫做喉輪、心口叫做心輪、肚腩叫做太陽神經蟲、疴殊殊嗰度叫做生殖輪、同埋兩條大腿中間叫做海底輪。

姑媽睇完成個過程,佢話都想知,跟著自己瞓低。媽子個大姑奶叫我幫姑媽做,我問佢:我都得?佢話可以。

於是,我就照住媽子個大姑奶嘅做法,拎著嫲嫲條頸鍊幫姑媽做。姑媽除咗個頭頂同埋大腿中間嗰個輪係順轉之外,其他都係逆轉嘅。媽子個大姑奶問我,咁即係點?我話,係咪即係表示姑媽頭同尾都可以,但係中間就唔乖囉?佢話我啱呀。

媽子個大姑奶話,每個輪位代表身體唔同嘅系統,知道邊個唔平衡就要處理處理。我就覺得有啲似睇醫生。

rondi
文章: 71
註冊時間: 2006-10-16, 20:40

文章 rondi »

小妹妹,你就快八歲之噃,就已經識賣關子囉,係唔係平日冇小朋友同你玩呢?

rondi,咁都畀您周到。 :oops:
老晴邊識賣關子吖,樓上句說話係佢媽子個大姑奶貼上嚟勾引您嘅。
公仔的確係老晴畫嘅,係筆錄嗰個未得閒貼帖啫。

問過老晴,佢話佢平日都好多小朋友同佢玩咖。

sze
文章: 29
註冊時間: 2006-05-10, 21:05
來自: 北角

are you sure?

文章 sze »

太陽神經蟲?

老晴
文章: 48
註冊時間: 2007-09-10, 09:56

牙齒 Cody’s diary 04

文章 老晴 »

圖檔

嗰日,我帶媽子個大姑奶陪我去檢查牙齒。去到治療大堂,坐咗好多小朋友,媽子個大姑奶問我係咪我啲同學仔?我話唔係,係第二間學校嘅,佢哋嚟聽講座。

交完手冊,我哋就坐喺喥等叫名。明明係叫我個名,媽子個大姑奶就無啦啦企起身,可能諗住同我一齊入去見醫生啩。我話佢知,淨係小朋友先至可以入去,大人係唔可以入去嘅。我叫佢坐定定等我,佢又真係好乖咁,坐響喥睇書。

過咗好耐,姑娘叫媽子個大姑奶入嚟接我。姑娘猛話我乖,然後有少少驚咁話畀媽子個大姑奶聽,幫我照咗X光,解釋話係醫生要照嘅,想睇下我啲牙齒嘅生長情況,仲幫我兩隻牙仔注入咗防護劑添。

離開咗醫院,我靜雞雞同媽子個大姑奶講,其實整牙嗰陣我唔係乖,係驚到成個人硬咗,唔敢郁。醫生叫我漱口嗰陣,我照鏡見到自己成口血,漱咗成十次先至無血咋。

醫生幫我照X光嗰陣,叫我望住牆上面隻狗仔,個姑娘就放咗塊藍色嘅膠壓住我個身。我問佢點解要咁做?佢話係用嚟定位嘅。跟住佢拎張X光片嚟睇,我覺得好肉酸。問姑娘張片嗰啲係乜嘢,佢話咪係我啲牙囉。我話好似好核突,佢話係咁咖啦。

我問媽子個大姑奶,點解我隻牙多咗兩粒銀色點點嘅?佢話係補牙用嘅粉,佢仲話我知佢都有。我叫佢畀我睇,又真係有好多喎,咁我都放心啲。

返到屋企,媽子個大姑奶仲教我攪笑刷牙法。佢話細細個保護功夫做得好,啲牙仔生得靚啲、長命啲。

老晴
文章: 48
註冊時間: 2007-09-10, 09:56

身體檢查 Cody’s diary 05

文章 老晴 »

圖檔

Fisheye
文章: 62
註冊時間: 2007-10-07, 22:12

文章 Fisheye »

好 ~~ 食物金字塔做得好, 好易明白, 又易記, 等我這個姐姐認識健康飲食的分組 :lol:

拜託 - 可否再畫一張正面圖給我看清楚全部的種類 :shock:

Fish姐姐

老晴
文章: 48
註冊時間: 2007-09-10, 09:56

聖誕快樂 Cody’s diary 06

文章 老晴 »

圖檔

今日,我同媽子個大姑奶去睇「花鼠明星俱樂部」,我覺得好好笑,同「五星級大鼠」一樣咁好睇。 :lol:

回覆文章