225 出奇 Remarkable

愛惜自己 - 活出彩虹
張慧儀
文章: 1621
註冊時間: 2006-05-10, 00:11
聯繫:

225 出奇 Remarkable

文章 張慧儀 »


出奇就出奇在教練居然讚我。
因為教練從來都唔會噉讚我,我估,可能係人之將死其言也善啩。(笑)

教練係咁講嘅:「你唔會好似一啲人噉,(佢地)賺好多錢,或者係好成功,或者係過緊你朝思暮想嘅日子 - 全世界呢度去嗰度去,去講學呀、去賣嘢呀噉,但係佢地嘅日子過得唔自在,見到佢地真係好辛苦。」

我完全認同教練嘅講法,我真係幫過唔少嚟香港講學、賣嘢、又或者做嘢嘅外國人當翻譯同秘書,見到佢地真係好攰好辛苦。

問教練:「點解會係噉嘅?」
教練話:「
因為佢地安排到但係享受唔到佢地想要嘅理想生活。

教練呢句金句,一講我就明嘞,唔係我聰明,而係咁啱有事例參照。

上月我去咗台灣進修,諗住橫掂大出血,人一世物一世,特地訂咗長榮 Hello Kitty 回程機票同 Hello Kitty 造型嘅兒童飛機餐,滋潤下我非常珍惜但又所餘無幾嘅童心。

回程當天,提早到達機場去探下 Hello Kitty 專用玻璃房。
玻璃房外邊貼滿 Hello Kitty 貼紙,內裡展示相關嘅精品:枕頭、毛巾、餐具、圍裙、飾物、立體砌圖、大型海報…,應有盡有。

正在一邊嘆世界一邊等上機時,見到一名彪形大漢在候機室破口大罵:「坐飛機咪坐飛機囉,坐乜 Hello Kitty 機,要 delay 成半粒鐘…」
上機坐穩,隔離行嗰個大媽好唔老嚟噉話:「幾十歲人仲 Hello Kitty Hello Kitty,都唔知醜,痴線…」

我心想,既然都上咗 Hello Kitty 飛機,不如好好噉享受當下,做乜事要搵啲嘢嚟挑剔,搞到樣都衰埋?

飛飛下,見冇乜嘢做,於是唔該隔鄰位嗰位靚女姐姐幫我影幾張相留個記念。
我倆邊研究拍攝角度、邊談論機上色彩繽紛嘅設計。
未幾,開飯,當我揭開兒童餐餐盒時,靚女姐姐見到餐盒各款精心設計的造型,情不自禁好肉緊噉驚嘆:「好可愛呀!」
大媽望過嚟,目光喺一秒之內由「搞乜呀你」變咗「鍾意鍾意」,好似小朋友見到喜愛嘅玩具噉樣。

我呢,百分百享受我為自己精心策劃嘅呢次返老還童飛機之旅。
教練唔讚,我都唔知自己嘅心境原來真係咁青春,諗起又開心咗一陣。